Жетісу облысында жастардың спортқа қолжетімділігі мен салауатты өмір салтын қалыптастыру бойынша қоғамдық мониторингтің нәтижелері
Жетісу облысында жастардың спортқа қолжетімділігі мен салауатты өмір салтын қалыптастыру бойынша қоғамдық мониторингтің нәтижелері
«Қос Қанат Жетісу» қоғамдық бірлестігі Еуропалық Одақтың қаржылай қолдауымен жүзеге асырылып жатқан «Дені сау болашақ: Жетісу облысында мемлекеттік жастар саясатын іске асыруға қоғамдық мониторинг» жобасы аясында Қаратал және Аксус аудандарында кең көлемді зерттеу жүргізді. Мониторингтің мақсаты – жастардың спорттық инфрақұрылымға қолжетімділігін, физикалық белсенділік деңгейін бағалау, сондай-ақ өңірде салауатты өмір салтын дамытуға қатысты өзекті мәселелерді анықтау.
Зерттеу қалай жүргізілді?
Мониторинг бірнеше бағытта өтті:
• спорттық нысандардың жағдайын талдау;
• азаматтардың, жастардың, сарапшылардың пікірін жинау;
• онлайн және офлайн форматтағы сауалнамалар;
• жергілікті билік өкілдерімен, студенттермен және ауыл жастары арасында фокус-кездесулер;
• спорт алаңдарының қолжетімділігі мен сапасын бағалау.
Қаратал ауданында 244 тұрғын, ал Аксус ауданында жүздеген жас онлайн сауалнамаға қатысып, өз пікірлерімен бөлісті. Бұл деректер өңірдегі жастардың нақты қажеттіліктерін түсінуге мүмкіндік берді.
Негізгі нәтижелер мен тенденциялар
1. Спорттық инфрақұрылымды кеңейтуге сұраныс жоғары
Қатысушылардың 20% жаңа спорт нысандарының қажет екенін айтты. Әсіресе ауылдық аумақтарда заманауи және қолжетімді алаңдардың тапшылығы байқалады.
2. Жарыстар мен спорттық іс-шараларды тұрақты өткізу маңызды
Респонденттердің 15% пікірінше, жүйелі түрде ұйымдастырылатын жарыстар жастарды ынталандырады, командалық рухты күшейтеді және салауатты өмір салтын насихаттайды.
3. Салауатты өмір салтын ақпараттық насихаттау қажет
Сауалнамаға қатысқан жастардың 10% ақпараттық кампаниялар мен жастарға арналған профилактикалық бағдарламалардың маңызын атап өтті.
4. Тегін секциялар мен үйірмелер ашуға сұраныс бар
Тағы 10% жас ауылдық және әлеуметтік жағдайы төмен аудандар үшін тегін спорт секцияларының ашылуын өзекті деп бағалады.
5. Жаттықтырушылар жұмысы мен спорт мектептерін дамыту қажет
Қатысушылардың 5% кәсіби жаттықтырушылардың жетіспеушілігін атап өтті. Спорт секциялары мен мектептерді көбейту бұл мәселені шешуге мүмкіндік береді.
Аксус ауданындағы мониторингтің қосымша қорытындылары
Ақсуда өткен талқылау кездесулерінде жастар өз ұсыныстарын ашық айтты.
Сауалнама нәтижесі бойынша:
• 85% қатысушы спорт инфрақұрылымын кеңейтуді бірінші кезектегі міндет ретінде көрсетті;
• 75% тұрақты спорттық іс-шаралар ұйымдастыруды қолдайды.
Жастардың айтуынша, заманауи спорт алаңдарының болуы – спортпен айналысуға қызығушылықты арттырады, бос уақытты тиімді өткізуге мүмкіндік береді және жаңа достар табуға жағдай жасайды.
Ұсыныстар
Жоба командасы зерттеу нәтижелері негізінде жергілікті атқарушы органдар мен тиісті мекемелерге арналған ұсынымдар әзірледі. Олар:
• жаңа спорт алаңдары мен нысандарын салу;
• тегін секциялар мен жаттығу бағдарламаларын көбейту;
• жастарға арналған ақпараттық кампанияларды күшейту;
• тұрақты жарыстар мен спорттық фестивальдер ұйымдастыру;
• спорт нысандарының қолжетімділігін арттыру (ауылдық аймақтарда басымдық беру).
Бұл ұсыныстар Жетісу облысында жастардың денсаулық мәдениетін көтеруге, спортқа кеңінен тартуға және сапалы инфрақұрылым қалыптастыруға бағытталған.
Бұл материал Еуропалық Одақтың қаржылай қолдауымен дайындалды. Оның мазмұны «Қос Қанат Жетісу» қоғамдық бірлестігінің жауапкершілігі болып табылады және Еуропалық Одақтың ұстанымын міндетті түрде білдірмейді.
